Cuadernos de Trabajo / Lan-Koadernoak aldizkariaren 100. alea ospatzen dugu

1989az geroztik etenik gabe argitaratzen den Cuadernos de Trabajo / Lan-Koadernoak Hegoa (CdT–LK) aldizkaria 100. zenbakira iritsi da abendu honetan. 36 urteko ibilbidea izan da giza garapenaren eta lankidetza eraldatzailearen esparruko problematikei, esparru analitikoei eta jarduerei buruzko alderdi askori buruzko ikerketen emaitzak zabaltzen.

Lan Koadernoak aldizkariaren lehen zenbakia, Samir Amin ekonomialari eta soziologo egiptoarraren lankidetza izan zena, Hegoaren lehen jarduera publikoarekin bat dator. Zenbaki honen beraren aurkezpenak jasotzen duen moduan, aldizkaria sortu zen “gizarte zientzien dibulgazioaren esparruan hutsune bat betetzeko asmoz, bereziki garapenaren gaiari dagokionez”.

Samir Aminen testuari,“Mendebalde-ekialde-hegoalde harremanen beste konfigurazio bat: desiragarria, probablea edo posiblea al da?” izenekoari, Clara Murguialday ekonomialari feministaren artikulua jarraitu zion: “Emakumeen mugimendua: Latinoamerikan eta Karibean azaleratzen ari den subjektu sozial berria”. Hurrengo alean, Xabier Gorostiagaren testuak nazioarteko ondarea eta sandinismoaren hondarrak izan zituen hizpide; 1990eko lehen Lan Koadernoarekin, Bob Sutcliffe-k gaurkotasun handiko gai bati zabaltzen zion atea: “auzi ekologikoa”. Haren esanetan, gai horrek jada “iraganeko ideologia eta teoria garapen-zale guztiei erronka” planteatzen zien. Nabarmentzekoa da, halaber, testu horretan bertan, ekonomialari britainiarrak garai hartan “herrialde aurreratuetan eskuinaren agerpena” aipatzen zuela.

Aldizkariak hainbat etapa izan ditu: hasieran paperean soilik argitaratzen zen, Hegoak antolatutako jarduera akademikoetan banatuz eta beste dokumentazio-zentro eta liburutegiekin trukatuz; ondoren, digitalizazio-prozesua egin eta aldi berean paperean eta Hegoaren webgunean argitaratu zen; eta, azkenik, egungo formatura iritsi da, formatu digital irekian soilik, bai Hegoaren webgunean bai EHUko Aldizkari Zientifikoen Atariaren bidez. Denbora horretan guztian, argitalpenak diseinu-berrikuntza ugari ere izan ditu.

Iragana gogoratuzx, etorkizunera begira

Ibilbide horri omenaldia egiteko eta garapenaren azterketei buruzko eztabaidarik berrienak lantzen jarraitzeko bultzada gisa, Hegoak Zubiria Etxeko Gradu Aretoan (Sarriko, Bilbo) urtarrilaren 15ean, osteguna, 12:00etan egingo duen jardueran parte hartzera gonbidatzen zaituztegu.

Cuadernos de Trabajo / Lan-Koadernoak aldizkariaren ale guztiak Hegoaren Argitalpenen webgunean eta EHUko Aldizkari Zientifikoen Atariaren bidez kontsulta ditzakezu.

Urtarrilaren 15eko jarduerari buruzko informazio gehiago nahi baduzu, idatz iezaguzu helbide elektroniko honetara: hegoa@ehu.eus