Zaurgarritasun Ibilbideetan Balantzaka: Diru-Sarrerak Bermatzeko Errentaren argi-ilunak

Doktorego tesi honetan gizarte bazterkeriaren bideetara gerturatu gara, zaurgarritasun istorioak nola perfilatzen diren aztertu asmoz. Zehazki, Diru-sarrerak Bermatzeko Errenta (DBE) jasotzen duten hamazortzi pertsonari burututako sakoneko elkarrizketetan oinarritu gara eta kontakizun hauei heldu diegu zaurgarritasunak har ditzakeen itxura anitzak behatzeko.

Ikerketaren emaitza nagusi gisa, bazterkeria faktoreek eta esparruek elkarren artean kateatzeko dauzkaten era amaigabeen artean, bi eredu nagusi nabarmendu dira: eredu batean euskarri izan daitekeen elementua hutsune nabaria izan daiteke bigarrenean.