Saharari Kantarik Euskal Herriko eta Saharako hamabost artista baino gehiago elkartuko ditu otsailaren 28an Euskaldunan egingo den kontzertu paregabean

Saharari Kantari kontzertu ahaztezina eta errepikaezina egingo dute datorren otsailaren 28an Euskalduna Jauregian. Hamabost artista euskaldun eta saharar baino gehiago elkartuko dira oholtza berean, saharar herriari babesa erakusteko, hain zuzen, Saharako Errepublika Arabiar Demokratikoa aldarrikatu zutela 50 urte betetzen direnean. 

Musika, beraz, justiziaren eta giza eskubideen defentsarekin konprometitutako bi herri eta bi kulturen arteko topaleku bihurtuko da.

Aziza Brahim abeslari sahararra izango da gonbidatu berezi gisa; Oreka Tx, Mikel Urdangarin eta Eñaut Elorrietarekin batera arituko da kontzertuan. Suilma Aalik, jatorri hispano-sahararra duenak, bere aitaren lurrari eskainitako abesti bat kantatuko du lehenengo aldiz. Aali, gainera, ‘Haizea harrien kontra’ abestia kantatuko du Itziar Ituño eta Olaia Inziarterekin batera.

Iker Lauroba, Fariba Sheikhan, Esti Markez eta Postal Kolekzionistak taldeak ere abestiak eskainiko dizkiote Mendebaldeko Saharari. Konpromisoz, elkartasunez eta aldarrikapenez beteriko ekimen honek keinua egingo dio ere herri palestinarrari, Gazako bi artisten emanaldi bereziarekin: Ahmed & Nur. Sorpresaren bat ere izango da Sua Enparantza dantzariaren eta Jon Maia bertsolariaren eskutik.

Kontzerturako musika banda bat sortu da, Antxon Sarasua, Dani Venegas, Joanes Ederra, Mikel Fagoaga eta Xabier Zeberiok osatua.
Ekitaldia Euskal Fondoak eta Arabako SEADen Lagunen Elkarteak antolatu dute, Bilboko Udalaren eta eLankidetzaren laguntzarekin.

Informazio gehiago: 

• Berri osoa Euskal Fondoa-ren webgunean.
• Spot. (YouTube)
• Sarreren salmenta (Euskalduna).