GKE humanitarioen aurkako erasoaldiak arriskuan jartzen ditu balio demokratikoak

Estatuko Garapenerako Erakundeen Koordinakundeak bere kezka eta gaitzespenik handiena adierazi du mundu osoan zehar erakunde humanitarioen aurka egiten ari diren eraso gero eta handiagoengatik, CIVICUS Monitor ekimenaren azken txostenak salatzen duen bezala. Ceutan joan den igandean bizitako errealitate hori eguneroko ogia izaten hasi da estatu osoko elkartasun erakunde askorentzat; izan ere, aspalditik hainbat eraso jasan baitituzte haien egoitzetan edo lantokietan. GKEen aurkako xaxatzeak, jazarpenak eta erasoek jarraitzen dute, eta haien lana arriskuan jarriz eta, horrekin batera, giza eskubideen bermea eta demokrazia bera: gizartearen zati baten eskubideak eta askatasunak murrizten direnean, mundu guztiaren bermeak ahultzen dira.

Ceutan bi aktibistari eta diputatu bati eraso egin zieten langile humanitarioekin nahastu zituztelako. Horrek agerian uzten du hiri autonomoan GKEen aurka dagoen etsaitasun giroa. Azken aldian gorrotoaren normalizazioak eta desinformazioak elikatu dute egoera, eta erasoen jopuntuan jarri dituzte pertsona migratzaileak eta giza eskubideak, informaziorako eskubidea edo ekintza humanitarioa defendatzen dituztenak.

Koordinakundeak gogorarazi du gizarte liskarra eta egiturazko arrazakeria elikatzen dituzten diskurtsoak etikoki gaitzesgarriak, profesionalki arduragabeak eta sozialki arriskutsuak direla. Ezinbestekoa da langile humanitarioak eta gizarte zibileko erakundeak babestea, haien lanerako ingurune seguru eta egokia bermatuz.

Erantzun humanitarioak eskatzen dituen krisia

Ceutako krisi humanitarioa halakotzat hartu behar da. Horrek eskatzen du erantzunak zorrotz betetzea horrelako egoerak arautzen dituzten printzipio humanitarioak eta nazioarteko legeak. Ildo horretan, GKEak nazioarteko legedia eta beren eginbeharra betetzen ari dira, hau da, ehunka migratzaileri laguntza eta babesa bermatzea (horietako asko errefuxiatuak izan daitezke, eta beste asko muturreko kalteberatasun egoeran harrapatuta dauden haurrak eta sexu-esplotaziorako arrisku berezia duten emakumeak eta neskatoak). Betebehar hori Espainiako Estatuan eta mundu osoan betetzen da, eta milioika herritarren babesa du.

Agintariek pertsona guztiak babestu behar dituzte, ekintzaileak, kazetariak eta beren lana egiten ari diren langile humanitarioak barne. Lehentasuna giza duintasuna defendatzea izan behar da, gizarte osoaren ongizatea eta segurtasuna bermatuz.

Koordinakundeak abuztuan esandakoa gogorarazi du: funtsezkoa da, halaber, Ceutako herritarren beharrak eta beldurrak ulertzea. Ceutako biztanleriaren, marokoar pobreenen edo muturreko gatazka eta egoeretatik ihes egiten dutenen beharretatik harago dauden logika eta arrazoi geopolitikoei erantzuten die krisialdi honek. Pertsonak ezin dira presio politiko edo geopolitikorako tresna gisa erabili. Instrumentalizazio horrek urratu egiten ditu nazioarteko zuzenbidea, gure gizarteak gidatu behar dituzten printzipio eta balio demokratikoak eta giza bizitza babesteko betebeharra.

GKEen aurkako jazarpena globala

Elkartasunaren aurkako diskurtsoak eta politikak aurrera egiten ari dira, eta gizarte erakundeen jazarpena areagotu da mundu osoan, «GKEen aurkako» legeen bidez. Hori dela eta, sektore humanitarioarekiko etsaitasun giroa larriagotzen ari da. Erdialdeko Amerika edo Palestinako kasuak bereziki kezkagarriak dira, baina ez dira bakarrak.

Koordinakundeak gogorarazi du: GKEek egiten duten lana inoiz baino beharrezkoagoa da, mugetatik harago doazen hainbat krisialdik markatutako testuinguru batean. Elkarrizketa eta bizikidetza baketsua defendatzea ez da luxu bat, ezta inozokeria bat ere. Oinarrizko baldintza da demokrazian bizitzeko eta gatazkei aurre egiteko, gorrotoa eta konfrontazioa elikatu gabe. Egoera horren aurrean, erantzukizuna partekatua da: erakunde politikoek, gizarte zibilak, komunikabideek eta herritarrek beren gain hartu behar dute, modu bateratu eta eraginkorrean, giza eskubideak, laguntza humanitarioa eta bizikidetza bermatzeko betebeharra. Koordinakundeak dei egiten die guztiei elkartasuna eta balio demokratikoak defendatzera, eta egiturazko konponbide iraunkorrak bultzatzera, antzeko egoerak berriro gerta ez daitezen.

Informazio gehiago:

• Berria Euskadiko GGKEen Koordinakundearen webgunean.

• Kanpaina Estatuko Garapenerako Erakundeen Koordinakundearen webgunean.