Trantsizio ekosozialerako landa-ekintzailetza asoziatiboetan gaitzeko eskolak 35 ekoizle graduatu ditu Cayamben (Ekuador)

Data: 2026(e)ko Irailak 21

2026ko ekainaren 22an, Cayambeko Domingo Salvio ikastetxeko antzokian, trantsizio ekosozialerako ekonomia sozial eta solidarioko landa-ekintzailetza asoziatiboen kudeaketan gaitzeko eskolaren graduazio- eta amaiera-ekitaldia egin zen. Gutxienez eskolen % 80ra bertaratu eta amaierako lana aurkeztu ondoren, hogeita hamabost parte-hartzailek euren ziurtagiria jaso zuten. Horietatik, 16 Cayambeko Ekoizle Agroekologikoen Kantonamendu Kontseilukoak ziren (CCPAC), eta 19 Cayambeko Emakumezkoen Kantonamendu Mugimendukoak (MCM).

Ekuadorko Unibertsitate Zentraleko Ekonomia Sozial eta Solidarioko ikertaldeak (ESSI-EUZ) eta Maquita fundazioak bultzatzen duten eskola ekimen giltzarria da Hegoa Institutuaren (EHU) trantsizio ekosozialei buruzko lan-ildoan. Erreferentziazko lurraldeetako antolakunde subjektuen gaitasuna indartzea du xede, eta, horretarako, prestakuntza espezializatua ematen die haien ekonomia sozial eta solidarioko (ESS) prozesuen diseinuan eta kudeaketan. Era horretan, trantsizio ekosoziala bultzatu nahi du, lau lehentasun lehenetsi hauek kontuan hartuta: ekonomia sozial eta solidarioa, agroekologia eta elikadura-burujabetza, generoa eta bizitzaren jasangarritasuna eta dimentsio ekologikoa.

CCPACen eta MCMren eskari zehatz bat izan zen eskolaren abiapuntua, eta 2025eko martxotik eztabaidatu da; alegia, landa-ekintzailetza agroekologikoen kudeaketa, elikadura-burujabetza eta ekonomia sozial eta solidarioa indartzea. Gaikuntzaren edukiak ez ziren proiektuan oinarrituta aurretiaz zehaztu; aitzitik, burkideen beharrizan eta eskari propioak bildu zituen aurretiazko diagnostiko-prozesu batetik sortu ziren. Deialdiak hamalau tailer eskaini zituen lau modulutan, helburu honekin: gutxienez, parte-hartzaileen % 80 emakumezkoak izatea, eta % 30 gazteak.

2025eko ekainetik 2026ko uztailera bitartean egin zen prestakuntza-prozesua, hainbat eduki uztartuta, hala nola kostuak, aurrekontuak, berrikuntza, kontserbazioa, produktu-aurkezpena eta merkaturatzea, eta trantsizio ekosoziala ardatz transbertsala izanik. Amaierako lanak izan ziren aplikazio-mekanismo nagusia. 14. tailerrean —Cayambeko eguneroko azokan egin zen, ekainaren 1ean—, hamahiru proposamen aurkeztu ziren, banakoenak eta taldeenak; adibidez, landa-turismoaren bidez egituratutako oilo-haztegia eta fruitu gorrizko snack baten ekoizpena, azokaren soberakinak aprobetxatzeko. Prozesuan egin ziren ebaluazioen arabera, gogobetetze globala % 91,70ekoa izan zen.

Eskolak agroekologiaren ahalmen eraldatzailea eta euren komunitateetan eta lurraldeetan jarraitzen duten landaguneko emakumeen lidergoa frogatu zuen. Halaber, lagungarria izan zen nekazaritzako elikagaien trantsiziorako eta trantsizio ekosozialerako erreferentziazko aukera globalak proiektatzeko, solidaritatea eta elkarlana indartzeko eta bizitza ekonomiaren erdigunean kokatzeko.

Informazio gehiago:

Argazkiak: